كنت بخاف من خيالي

الأخت : ن.ف.ب - بنت البابا كيرلس تقول بعد ما البابا كيرلس افتقدني في حلم وكنت باشوفه في منظر مهيب وكان بيقولي في كل مرة أشوفه انت مبتجيش الكنيسة ليه وفعلاًَ قربت من ربنا كتير بعد الحلم الجميل ده وأصبحت باعتبر نفسي بنت البابا كيرلس وبقيت واثقة جدا من شفاعته وقوة تأثيرها في حياتي وجيت في فترة قلت أنا نفسي أشوفك يابابا كيرلس وجهاً لوجه . لأن أنا مش من الجيل اللي عاصر قداسته ولا حتي كنت أسمع عنه لما كنت بعيدة عن الكنيسة وطبعاً كنت باقرأ كتب كتير من كتب معجزات البابا كيرلس وسيرته العطرة وعلشان كده كنت متلهفة إني أشوفه وأمنية اني أشوف البابا كيرلس مكانتش مجرد كلمة قلتها مع نفسي ولا لحظة تمني عابرة . لكن كنت كل شوية فعلا أقول ياريت يابابا كيرلس تخليني أشوفك وجهاً لوجه . وفي يوم كان الكل في البيت نايمين وأنا بس اللي صاحية ع السرير بصيت لقيت قدامي البابا كيرلس ، لكن حسيت بخوف شديد جدا واترعبت ورحت مغطية راسي بالبطانية بسرعة فسمعت صوت بيهمس في وداني : أظهر واللا لا !! فاستنيت شوية لغاية ما اتمالكت من شدة الخوف لأني كنت باخاف من خيالي وقلت له بصوت واطي قوي اظهر يابابا كيرلس ورفعت البطانية من علي رأسي وإذ بي أشوفه واقف جنبي . وبعد لحظات اختفي ففرحت جدا لأنه لبي طلبي وجاني بنفسه ومن يومها اتعلمت مخافش لأنه فعلاً شال من جواي الخوف وبقيت إنسانة قوية جدا بنعمة ربنا فشكراً لله الذي افتقدني من خلال قديسه البابا كيرلس ومهما حاولت أرد جميله مش هييجي حاجة من جميله الكبير علي فليتمجد اسم الرب في شخص قديسه العظيم البابا كيرلس السادس بركة صلاته تكون مع جميعنا أمين